-مراد.....حبيبى.......اصحا من النوم بقا. قالتها بدلال ودلع.
قام من النوم يتمطع
قالت- صباح الخير يا مرمر.
-صباح الن........ايه؟....قولتى ايه؟....مرمر ايه؟
-قولت ادلعك مدام انت مش بتدلعنى. قالتها بنبره عتاب.
قام من على السرير- وحياتك بلاش تدلعينى تانى.....حاسس انك بتكلمى مريم بنت اختك.
بصوت واطى- ال مرمر ال.
دورت وشها عنه وهزت راسها- مفيش فايده.
حضرت الفطار وحطت ورد فى نص السفره واستنته لحد ميطلع من الحمام.
طلع بسرعه وقال بلهفه- جعان اوى.
قالت فى كسوف- انا اسفه على اللى حصل امبارح.......ادينى عوضتها لك اهو وعملت لك احلى فطار فى الدنيا.
هز راسه وبدا ياكل – حصل خير .....حصل خير.
-اصل انا كنت متضايقه اوى.
-كان باين عليكى . قالها وهو بياكل وعينه على الاطباق ومسالهاش هيا متضايقه من ايه.
كمل كلامه- انا عارف انك زهقانه ....فاهم كل ده ....روحى عند خالتك حبه لو تحبى.
نفخت وبدات تاكل من سكات.
مسك الجرنال وبدا يقرا وهو بياكل وفجاءه ايده اتخبطت فى الفازه.
-اه..ايه ده يا ليلى؟.....شيلى البتاعه دى من هنا.
-ده الورد اللى بتحبه يا مراد.
-ورد ايه بس؟...مش عارف اكل منها.
شال الفازه وحطها على الارض.
قالت تعمل محاوله اخيره.
قامت من مكانها وقربت منه .....مسكت خده وبصوت واطى –ايه رايك فى الاكل يا حبيبى؟
قربت شقايفها من خده........قام من مكانه فجاءه وهو منهمك فى القرايه وسرحان فى الجرنال اللى فى ايده.....دخل اوضه الجلوس.
قال – حلو يا ليلى الاكل ...بس ناقص ملح والبيض نيىء شويه.
وقفت متسمره ووشها احمر من الغضب.
من جوه الاوضه زعق بصوت عالى علشان تسمعه- ليلى ....كوبايه الشاى من فضلك.
دخلت عليه وفى ايدها سكينه المطبخ وعينها مليانه شر .....رمى الجرنال من ايده وفى خوف- فى حاجه يا ليلى؟
بصت للسكينه ونزلتها من ايدها براحه وقالت بصوت واطى مريب- مش حعمل شاى ....انا تعبانه.
قال فى قلق- بلاش.....بلاش شاى..........ادخلى ارتاحى وحعمله انا.
دخلت اوضتها وحطت ايدها على خدها ووشها مليان اسى.
دخل وراها مراد وقال فى هدوء- مالك ياليلى؟....تعبانه؟
-لا...زهقانه.
-خلاص ياسيتى بكره الجمعه وروحى عند خالتك حبه.
فى استسلام- حاضر...وانت حتعمل ايه؟
-ولا حاجه ....حرجع فى ميعادى واجى اخدك من عندها بليل.
قالت فى لهفه- طيب ما بلاش خالتى ونتفسح انا وانت ؟
قال فى كسل- انتى عارفه انى مش بحب الفسح وباجى تعبان من الشغل ..روحى انتى وانبسطى.
قرصها من خدها برقه وابتسم- تمام كده يا سيتى؟
فى خضوع- اللى تحبه يا مراد.
طبطب على كتفها- يلا ..انا نازل يا حبيبتى.
هو قال ايه؟...حبيبتى....بقاله كتير مقالهاش.
-انت قولت ايه؟
وهومنهمك فى اللبس قال فى استغراب- بقولك نازل يا ليلى......حتاخر على الشغل.
خرج بره الاوضه ورجع تانى بسرعه- كنت حنسا...مش محتاجه حاجه وانا جى؟
-لا.
-البيت مش ناقصه حاجه؟
-لا.
-طيب ....عامه انا سايب فلوس على السفره علشان لو احتاجتى حاجه وفكرينى اشترى هديه لخالتك .....مع السلامه.
وقفل الباب وراه.....بصت للباب من سكات وهزت راسها.
قامت من مكانها وروقت البيت وشالت هدومه اللى مرميه على السرير كالعاده طبعا وقعدت تقرا فى الروايات اللى لسه شارياها.....الروايات دى حاولت تخلى مراد يقراها يمكن يتعلم من رومانسيه ابطالها لكنه حلف ميبص لها اصلا بلاش دلع ومياصه.
جت الساعه 4 بعد العصر .....فتح مراد الباب.
-السلام عليكم.
ليلى من المطبخ- عليكم السلام.....ثوانى والاكل يكون جاهز.
دخل اتوضا وصلى العصر .....اكل بسرعه ودخل ينام.
-مراد....حبيبى ...قوم بقا.....بلاش كسل...ده انا عامله لك كيكه الدره اللى بتحبها.
-سيبينى حبه......عاوز انام.
-بقالك ساعتين نايم....قوم بقا.
فضلت تهز فيه لحد مزهق وقام.
كملت كلامها- اغسل وشك يلا وتعالى نعد سوا.....حعمل الشاى واحط الكيكه.
قال وعينه مغمضه- حاضر....حاضر.
رن جرس موبايله- ايوه...ايوه يا صلاح ...طيب ....حترجع امتا من المشوار ؟حاضر حلبس وانزل حالا .....سلام.
قالت وهى مفجوعه- انت نازل؟ سالته والدمعه حتفر من عينها.
قام يلبس هدومه بسرعه- لازم انزل....المكتب فاضى ومفيش حد غيرى......هم ساعتين تلاته ....يعنى هيا اول مره يا ليلى؟
بصت له ولسه مفجوعه- انت نازل؟........طب والكيكه؟
طبطب عليها وابتسم.....وباسها من خدها بسرعه- لما ارجع.
خرج مراد وسابها لوحدها حاطه ايدها على خدها .......فضلت رايحه جايه فى الشقه ........بصت لراويات الرومانسيه بطرف عينها وقالت شكلها مفيش فايده والروايات دى خياليه زياده عن اللزوم.
وفى الاخر ملقتش غيره.
فتحت التلفزيون واعدت ادامه وحطت ادامها طبق اللب بتاع امبارح.
تمت
يعني انا راضي ذمتك .. بقا راجل شغال 7 ساعات و تاعب نفسه في شغله وقاعد يحل كلمات متقاطعة وفي الاخر تصحيه عشان كيكة درة ؟؟!!! انشالله عنه ما كل كيكة الدرة يعني
ردحذفوبعدين هي رفعت في وشه السكينة .. وهو سكتلها عادي كده ... احم احم هو اه حيخاف منها وش .. بس ترفع عليه سكينه وعايزاه بعد كده يعاملها كويس ؟؟؟؟!!
اسمعي مني مراد ده حيتجوز عليها
..........
فنيا بقا الكتابة كويسة .. بس حاسس انها محتاجة يكون فيها احداث اكتر .. او ده على الاقل لحد دلوقتي
بس تمام انا مش بدقق على التصحيح اللغوي والالفاظ والهري ده انا الاهم عندي القصة