قاعد مراد ادام ليلى والاثنين ساكتين وبيبصوا لبعض .
فى معاتبه- 15 يوم يا مراد؟
فى عتاب- 15 يوم يا ليلى؟
-هونت عليك؟
-وانا مهونتش عليكى؟
- انا كنت بسهر كل يوم مستنيه منك تليفون .
- انا بقا مكنتش بنام اصلا.
اتكسفت وبصت فى الارض- وحشتنى.
قال بفخر – عارف.
ضربته بدلع براحه- وحشتك؟
قرب منها وابتسم ووشوشها فى ودنها- فى البيت حتعرفى .
((فى البيت))
مراد نايم على السرير وليلى جنبه – ليلى؟
- ايوه؟
-عاوزين نتكلم سوا.
-فى ايه؟
- فى المشكله اللى حصلت ......وازاى كبرت مننا مره واحده كده؟
- لا يا مراد بلاش ......كل ما افتكر الايام دى اتعب .....عامه حصل خير .....حصل خير .
-معلش ...بس محصلش خير ......ولازم اعرف ليه الموضوع وصل لكده؟.........ليه بقالك فتره عصبيه ومتنرفزه؟.......ليه قولتى الكلام اللى قولتيه ليلتها؟.
اتكسفت وقالت- بصراحه الكلام اللى انا قولته كنت قاصده بيه انك تغيير وتحس بقيمتى وتحس انى ممكن اضيع منك ......ممكن كنت زودتها او قولتها بغشوميه بس ده كان قصدى.
قال فى دهشه- انا مش فاهم حاجه؟
- بص يا مراد......انا فى حاجات جوايا وبحاول ابينها لك ومش عارفه ....وده اللى مخلينى متلغبطه وبعمل حاجات معرفش نتائجها ايه؟
-زى ايه؟
-نفسى تحبنى زى مان ......فاكر يا مراد......فاكر لما كنت بغيب عنك يوم ولا اثنين بتبقا ملهوف عليا ازاى؟كان بيبان عليك انى وحشاك لكن دلوقتى انت مش بتحبنى.
-انا؟......ليه بتقولى كده؟
-هاملنى دايما .......تيجى من الشغل تعبان تنام حبه وتنزل الشغل تانى .
-هو انا بتعب علشان مين؟
-انا مقولتش عاوزه حاجه.....انا عاوزاك انت.
سكت وسمع لها كويس.
كملت كلامها- ده انا بشحت الحب منك بالعافيه ...اعمل خطيبى مبعملش...بص لى فى عينى مببصش.....كلمه وحشتينى مقولتهاش ليا الا لما غيبت عنك 15 يووم .......كل ده تاعبنى من جوايا بس مش بتكلم ......انت مش فاهم ان الحاجات دى مهمه اوى للست ......الحاجات البسيطه دى هى اللى بتخليها حاسه انها عايشه وليها اهميه عند جوزها.
-كل ده جواكى؟
-حاولت افهمك بس انت مش بتساعدنى .
-هو ده اللى مخليكى زعلانه ومتضايقه دايما؟
-ايوه.
اتنهد اوى وسكت وبص لها- انتى انانيه.
فى دهشه واستغراب- انا؟
-ايوه انانيه.......دايما بتفكرى فى اللى انتى عاوزاه واللى انتى محتاجاه واللى يريحك انتى ويفرحك انتى ....يعنى انا مش بحبك علشان مش بعمل الحاجات اللى انتى عاوزاها.........دايما انتى .....انتى......انتى...........تبقى انانيه ولا لاء؟
الكلام وجعها اوى وسرحت فى كلامه.
كمل كلامه- موضوع الحمل........الموضوع ده مشترك بينى وبينك لكن انتى عاوزه متخلفيش دلوقتى واحترمت رغبتك بالرغم من انى حموت على طفل وانتى عارفه كده.
اتعدل فى السرير وبص لها اوى – مفكرتيش انى بحبك بس بطريقتى انا؟........يعنى لما بموت نفسى فى الشغل علشان اجيب لك اللى انتى عاوزاه وميكونش فى نفسك حاجه ابدا........ده مش حب؟؟...............لما اقلق عليكى وانتى رايحه اى مشوار حتى لو كان السوق ..............لما اغير عليكى من الهواء اللى بتتنفسيه ده يبقا اسمه ايه؟.........ده مش حب ده؟؟؟.........بس انتى مش حاسه.
-ياااااااااه............ مقولتليش الكلام الحلو ده قبل كده ليه؟؟
-حسيه ....مش لازم اقوله.
بحده- لا....لازم تقول انك بتحبنى ولازم اسمعها منك وتسمعها منى ......يمكن اكون انانيه بس مش بايدى.
-انتى بتتكلمى عن الحب زى بالظبط المراهقات بتوع اعدادى وثانوى ......مش ست متجوزه.
- ايوووه......يمكن اكون كده .....لان انت اول حب فى حياتى.....لانك كنت عاوز قطه مغمضه وانا القطه دى......انا حبيتك انت ...لا حبيت فى اعدادى ولا ثانوى.
انا مسمعتش كلمه بحبك الا منك انت .......محدش مسك ايدى الا انت .......وبعد متملكتنى وقفلت عليا بابك نسيتنى ونسيت ان ليا مشاعر ......مراهقه؟؟........وماله لما اكون مراهقه معاك.......انت بتتكلم عن الحب بمنظور عملى جدا......يعنى لو قلت لك انى بعملك اكلك وبغسلك هدومك ده دليل عن الحب ......حتوافقنى؟
-يااااه يا ليلى ده انتى شايله جواكى كتير اوى وانا مش عارف.
مردتش عليه ونامت وعطيته ضهرها وهو كمان نام وعطاها ضهره.
الليله دى محدش فيهم نام بعد مصارحو بعض وواجهو بعض باللى فى قلبهم.....اى نعم الحقيقه صادمه بس كان لازم كل واحد فيهم يراجع نفسه.
فضلو يومين ميكلموش بعض ودايما سرحانين وبيفكروا.
((اليوم الثالث))
الساعه 4 بعد العصر.
-انت جيت يا مراد؟(صوتها من جوه الاوضه).
-ايوه.
-ثوانى والاكل يكون جاهز ...استريح لك شويه من تعب الشغل.
مراد- توء...توء...انا اسف.
-حصل ايه؟
-دخلت بالجزمه من غير ما اقصد .....معلش والله.
طبطبت عليه وباسته من خده – ولا يهمك مهو كل يوم بيتكنس........حصل خير .
دخلت المطبخ تسخن الاكل ورجعت تكمل خياطه البنطلون.
(اهواااااااك واتمنا لو انساااااااااك.....وانسا روحى ويااااااااااك)
ليلى- ايه ده؟انا نسيت الراديو مفتوح؟.....اقفلو من فضلك يا مراد.
طلع مراد من الاوضه ولابس بدله الفرح الوحيده اللى عنده .
-لا.......انا اللى مشغله(قالها بصوت مليان شجن)
بصت له باستغراب – مالك يا مراد؟.......ايه اللى جرى لك؟
قرب منها ومسك ايدها ووقفت وهيا مخضوضه.........مسك وسطها وقال بصوت رقيق- تسمحى لى بالرقصه دى؟
وطلع ورده من جيب القميص اى نعم مبهدله وورقها واقع بس مش مشكله.
مسكت الورده وقالت فى خضه-مين؟ انا؟
-اومال امى؟.....متضيعيش جمال اللحظه باسئلتك السخيفه دى.
ضحكت ليلى بفرحه ورقصو مع بعض على انغام اهواك اللى بتعشقها ........اول اغنيه سمعها لها مراد علشان يعترف بحبه.
نسوا الدنيا .......نسوا نفسهم .......نسوا كل حاجه االا........
-الاكل...الاكل على الناااار(صرخت ليلى).
مسكها جامد- انا طفيت عليه.
-انت عامل حسابك على كل حاجه.
ابتسم وكمل رقص.
همس فى ودنها- انغام الاغنيه بتفكرنى بلحن صوتك فى ودنى وانتى بتقوليلى بحبك.
وقفت ليلى وبطلت رقص.....بصت له اوى وسرحت......هرشت فى راسها وفجاءه انفجرت فى الضحك.
-بتضحكى على ايه؟
-مش قادره.......مش قادره ابطل ضحك.
-الله؟......طيب انا غلطان.
-استنا بس ....اصل الجمله دى قالها .....قالها .....عمر الشريف لناديه لطفى وهم بيرقصوا على نفس الاغنيه.
وكملت ضحك.
ضحك ووشه احمر من الكسوف وبص فى الارض- مشكلتك انك حافظه كل الافلام العربى.
كملت رقص معاه وقالت- انا بحبك زى ما انت .........سيبك من عمر الشريف ده ...........ده ييجى ايه جنبك؟
ابتسم وفرح اوى وكمل رقص وقال فى سره- انا احلى منه اصلا.
ليست هناك تعليقات:
إرسال تعليق