الساعه 10 بليل ....فتح مراد الشقه ودخل اوضه الجلوس ...بصت ليلى للجزمه بصه ذات معنى.
من غير ولا كلمه قلع جزمته زى الشاطر.
-مساء الخير.
-اهو مسا والسلام(طبعا فى سرها)
قالت بصوت واطى- مساء النور.
اخد حبه من اللب اللى فى الطبق......بصت بعينها للب اللى فى ايده.
نفخ – ياستي ححط القشر فى ايدى.
رجعت تتفرج على الفيلم بتاثر شديد.
مدد على الكنبه وقال- فيلم ايه ده؟
اتنهدت – نهر الحب.
-نهر الحب؟.....اه اه ...افتكرت .....مش ده الفيلم اللى فيه الست حتسب جوزها وابنها علشان راجل تانى؟(قالها وهو بيقزقز اللب)
بص لها اوى وبصيت له ورفعت حواجبها ولسه حتتكلم.
قال بسرعه- مقصدش فاتن حمامه طبعا ....دى على راسى من فوق.
بس اصل فاتن غلطانه ...على طول تطلع خاينه ولا ايه؟
دورت وشها للتلفزيون- شششششششش......... استنا ...استنا.... احلى حته بحبها.
(فاتن حمامه بتحاول تهرب من الحفله قبل ما القدر يجمعها بعمر الشريف...فجاءه الدنيا ضلمه ويظهر عمر الشريف ببدلته الميرى وتتصدم فاتن حمامه بفرحه ويجمعهم القدر تانى )
-ليلى.....ليللللللللى.
فاقت من سرحانها- ايوه يا اخى فى ايه؟
- مالك سرحانه كده ليه؟
-لازم اسرح يا مراد .....ده عمر الشريف....مش شايف عينيه؟....بقولك عمر الشريف.
قام من على الكنبه- عين مين؟ وعمر مين؟
سكت شويه وقال بصوت واطى- انتى عارفه ان الناس كلها بتقول انى شبهه؟
قالت بسخريه- اه طبعا كنت شبهه.
-اييييييه؟....كنت؟......يعنى ايه بقا؟
(بصراحه مراد شبهه عمر الشريف وده سبب من الاسباب اللى شدتها ليه....نفس طوله ...نفس جسمه....نفس شكل عينيه...بس مراد بعد الجواز بقا شبهه عمر الشريف بس طالع له كرش صغير واحيانا بينزل من البيت وينسا يسرح شعره ولما بيكتئب بيبقا عمر الشريف بس بدقن زى المجاذيب ويا سلام لو مستعجل علشان الشغل ممكن ميكويش القميص اساسا ......ده بدا يبقا شبه عمر الشريف فى فيلم اشاعه حب دايما مبهدل ومش عارف يقول كلمتين حلوين على بعض ).
قالت بعد ما قام وقف علشان يثبت لها انه شبهه عمر الشريف- يا سيدى كلمه قولتها ...اعد بقا.
قال فى همهمه – انا احلى منه اصلا.
قعد جنبها وهى مركزه فى الفيلم وعاوز يشد انتباهها والسلام- قومى حطى لى الكيكه.
-لا.....لا استنا يا مراد بعد الفيلم .......الا الفيلم ده.
-يا سلااااام؟........اشمعنا يعنى؟
بصت له باستغراب- هاااااار اسووود.....الفيلم ده غايه فى الرومانسيه.
-رومانسيه ايه؟......دى ست مش محترمه وخاينه.
مش محترررمه؟؟ ليه بقا؟
-تسيب زكى رستم جوزها الراجل المحترم وابنها وتروح لراجل تانى ؟...ده كلام يا ناس؟
قالت مدافعه-القدر جمعهم هيا حاولت تبعد عنه بس الحب.........
قاطعها- بلاش كلام فاضى ......مفيش مبرر للخيانه حتى لو كان تعامله صعب شويه ...ده لو على كده كانت ستات مصر كلهم حبو عمر الشريف........اصدى راجل تانى يعنى.
-غرررريبه مع انك كنت بتحب الفيلم ده اوى ايام الخطوبه وبتقولى ان الحب لازم ينتصر.
-اه ...اه...بس انا دلوقتى راجل متجوز ...تفكيرى اتغير.
سكت شويه –انا داخل اغير هدومى ............وعاوز اكل الكيكه بقا.
دخل الاوضه وبص فى المرايه وقال فى سره- على النعمه انا احلى منه ......بس لو الكرش يتشال ابقا زى الفل....وميضرش لو جنجلت شعرى برضو.
طلع بره لقاها مفلوقه من العياط ......اتخض وجرى عليها- مالك يا ليلى؟
- مااااااااات.......مااااات.
فى خضه- مين؟....جوز خالتك؟
شاورت على التلفزيون- عمر الشريف .
نفخ وقام من مكانه- يحرق عمر الشريف يا شيخه.....ميموت ولا يغور فى داهيه...كل العياط ده علشانه؟
-اخس عليك يا مراد..... كله الا عمر.
- لا يا شيخه؟..........طب اهووووه.
طفا التلفزيون ودخل اوضته.......رجع لها تانى وقال فى نرفزه- عاوز الكيكه بتاعتى ولما نشوف انا ولا سى عمر؟
(ايه ده؟.....دى غيره دى ولا ايه؟...مهو حساس اهو ....لكونش ظالماه؟)فكرت فى كل الكلام ده وهيا داخله الاوضه ورا مراد.
-انت بتزعق ليه؟....هو انت كل متشوف فيلم فيه اثنين بيحبوا بعض ....تتنرفز كده؟.....وتتضايق؟
-وانا حتضايق ليه؟
-عامه....اللى غيران منهم يعمل زيهم.
بص لها باستغراب شديد- انتى عاوزانى احب عليكى واحده تانيه؟
ضرب كف على كف وكمل كلامه- انا مستغربك جدا يا ليلى.
(يا سلام...يعنى مينفعش يحبنى انا؟....هيا راحت عليا؟.....طبعا مهو خلاص ....مدام اتجوزنى يبقا يحبنى ليه؟....ويحس بمشاعرى ازاى؟..... مهو اتملكنى يبقا يشوف غيرى؟.....ال واحده تانيه ال)فضل الكلام ده يدور فى دماغها وهى بتقرب منه وقالت- على الله اسمعك تقول واحده ثانيه؟ انت فاهم؟
هز راسه فى توتر- فاهم....اصل انتى بتقولى.......
حط ايدها على اسها وقاطعته- مافيش فايده.......مش حتفهمنى ابدا.
عاطيته ضهرها وهى خرجه من الاوضه.
-ليلى....لوووووله......لولتتتتتى.
لفت وبصت له لقيته مبتسم لها وفارد ايديه الاثنين....هو ده مراد بتاع زمان...مش قادر على زعلها وبيصالحها.
جرت عليه وحضنته جامد.
وشوشها فى ودنها .....(ياترى حيقولى بحبك زى زمان....ولا حيقولى وحشتينى بقالنا كتير ما اعدناش اعده رومانسيه مع بعض ولا.......
قال مقاطع تفكيرها وبصوت حنين- ليلى....النهارده الخميس وبكره الجمعه اجازتى.
شالت نفسها من الحضن – انت جايبنى من اخر الاوضه جرى وفاتح لى دراعاتك علشان تفكرنى بالنتيجه؟.....ما انا عارفه ان بكره الجمعه......كل جمعه وانت طيب....جمعه مباركه يا مراد.
-لا....لا....انا اقصد ..احم.....احم...مش حتلبسى القميص ابو 250 جنيه.
بصت فى الارض وبصت له- مفيش قميص ....مفيش خميس.....مفيش ليلى.
...اناتعبانه يا مراد....تعبااااانه.....ومش قادره البس القميص........اه نسيت ابو 250 جنيه.
فى هدوء وبصوت واطى- خلاص ياليلى .....بلاش ....بلاش.....بس وطى صوتك من فضلك.
-هو انا عليت صوتى؟........انا معليتهوووووش....انا مااااشيه.
-رايحه فين؟
-اتفرج على عمر الشريف.
قال فى نرفزه – ليلى؟........طب والكيكه؟
تمت
.jpg)
.jpg)
.jpg)
ليست هناك تعليقات:
إرسال تعليق