الايام ممله ورتيبه كالعاده الا من انتظام ليلى فى مواعيد الدواء اللى بدات تاخده بعدما اتاكدت ان الحمد لله مفيش اى موانع للحمل.
الساعه 4 دخل مراد الشقه وليلى رابطه شعرها بايشارب عجيب ولابسه جلابيه بيضاء قصيره مليانه بقع طماطم على بقع ملوخيه .
اول مشافها فضل يضحك عليها.
-احلى حاجه لما الواحد يجى بدرى وعلى فجاءه ...بيشوف بلاوى .
بصت له بقرف وباستغراب وبصت لهدومها- عادى يعنى.....وايه المشكله؟......ما انت كل يوم بتشوفنى حلوه .....ايه الجديد؟.......عاااادى ....مش يمكن لما تشوفنى شبه الخدامين تتغير حبه؟
دخلت الاوضه وغيرت هدومها وطلعت كانها واحده تانيه خالص
-مراد هو انت جيت بدرى ليه صحيح؟.(قالتها بدلع).
قرب منها وهو مبتسم ....مسكها من وسطها ......وشوشها فى ودنها – يعنى مش عارفه ليه؟ (غمز بعينه).
عملت مكسوفه وبصت فى الارض- لا مش عارفه......قووول.
صرخ بعلو صوته- النهارده ماتش مصر والكوتى دفوار .
-ها؟َ؟
مشى بسرعه علشان يفتح التلفزيون ويتفرج على الماتش.
سابها تبرطم فى سرها- كوتى دفوار؟ وماله؟..........الهى يا مصر تخسرى 3.0 علشان تستريح يا مراد يابن تفيده.
قعد يتفرج على الماتش وينط ويتهز ويشوط ويضرب بالروسيه.
وهيا قاعده جنبه مش فاهمه اى حاجه فى الماتش ولا عارفه مين مصر ولا مين كوتى دفوار.
-مراد.....مراااااد.
- هه؟(قالها وهو منفعل اوى مع الماتش ومش مركز)
- عاوزه اكلمك.
- دلوقتى؟؟؟؟
- ايوه.
-لا... معلش فى الاستراحه ان شاء الله.
- فاضلها اد ايه؟
- ربع ساعه
- اوووووف.
وعدت الربع ساعه.
- الماتش خلص يا مراد ممكن نتكلم .
- اه.......اه ماشى(قالها وهو متوتر لان مصر كان لعبها وحش جدااا)
- بص يا مراد ......واحده واحده وبراحه كده.
- ايوه معاكى (قالها وعينه على التلفزيون)
قامت طفت التلفزيون.
-ليه كده؟ (قالها فى غيظ)
-علشان نتكلم بتركيز.
-طيب.......ادينى سامع.(حط ايده على خده)
- مراد ..ا...ا...... انا عاوزه منك طلب.
-اؤمرى.
-عاوزاك تجيب لى ورد كل فتره والتانيه؟
-ورد؟؟؟.....ورد ايه؟
-ورد يا مراد اللى فى الجنينه ده ......عارفه؟
- اه طبعا عارفه .....بس لازمته ايه ؟
- ياسيدى انا بحب الورد وعاوزاه.
-هو ده الموضوع المهم؟؟؟؟؟
بصت له اوى – ايوه مهم .
-بالنسبه للورد انا بتكسف امشى بيه فى الشارع .......شوفى حاجه تانيه.
- اوووووف.......طيب ليه يا مراد متمسكش ايدى مثلا وتعد تسرح فى عينى .
بص باستغراب – اعمل ايه؟ اسرح فى عينيكى ليه؟طيب ما انا حافظهم.......ده انتى ادام عينى على طول .......اسرح ليه واسرح فى ايه؟
-برضو مش فاهمنى .....طيب حسهلها ....تيجى نلعب اننا مخطوبين؟؟
مسك راسها كانها سخنه
شالت ايده وقالت- مش بهزر يا مراد ......فيها ايه لو نلعب مخطوبين؟
قرب منها اوى وبص فى عينها – طب منلعب عروسه وعريس ؟
-يووووووه......ماهو احنا بنلعبها على طول دى ........تعالى نجرب اللعبه التانيه ونعيد ذكريات خطوبتنا.
-انتى مجنونه والله.....اكون متجوزك واعمل نفسى خاطبك؟؟
-وماله ؟ تيجى من بره مثلا وتقولى يااااااه وحشتينى اوى و.......
-وحشتينى ايه؟......على اساس انى مسافر ابو ظبى ؟...ثانيا يا حبيبتى انتى فى قلبى على طول فمش لازم اعمل الحركات دى ......عاوزه حاجه تانيه؟
اتنهدت اوى- يامراد الحب العذرى ........
قاطعها بسرعه وفى فجعه-عذرى؟ عذرى؟ عذرى ايه يا هانم؟.....لا ....دى عيبه فى حقى انا ......ده كام شهر وتطلعى حامل .....ال عذرى ال.
قعدوا ياخدو ويدو فى الكلام مع بعض كل متيجى كده يجى هو كده .
وفجاءه صرخ مراد- الماااتش....المااااااتش.
فتح التالفزيون
المعلق- فاضل ثلاث ثوانى وادعوا لمصر .
-جووووووول.......جوووووووووووول(صرخت ليلى باعلى صوتها)
المعلق فى شجن- 0,1 للكوتى دفوار وهارد لك لمصر .
لعبت ليلى حواجبها لمراد- احسن......احسن.......خالى الماتش ينفعك.
فى نرفزه- انا نازل.
-رايح فين؟
-اتفرج على التعليق فى القهوه واسيبك تفرحى بنصر الكوتى دفوار براحتك يا عدوه الوطن.
((رجع البيت ومعاه كيسه))
-رجعت بسرعه ليه؟ وايه الكيسه دى؟
-خدى يا سيتى (سابها على السفره ودخل اوضته).
-ايه ده؟ ايه ده؟ وررد.
-اه.
-فى حد يحط الورد فى كيسه كده؟
-ملقتش غير دى اداى فيها الورد.
-وتداريه ليه؟
-يا سلاااااااام؟؟.......ادخل الشارع بورد؟.....يقولو عليا ايه؟
ضحكت- مفيش فايده فيك بس شكرا اوى يا مراد ربنا يخليك ليا مع ان تقديمه الورد احلى حاجه فيه بس مش مشكله .
مسكت الورد ولعبت بيه وحاطته فى الفازه.
مراد بيتفرج عليها وبيضحك فى عقل باله (ساعات بحس انها عيله صغيره مش ست متجوزه وعاقله......بحبك يا مجنونه).
ليست هناك تعليقات:
إرسال تعليق