قاعدين الصبح على السفره بيفطروا وليلى حاطه كل اللى فى الثلاجه.(كل متزعله تروح ما كلاه اكله حلوه)
-مراد. قالتها بصوت واطى.
-ايوه؟ قالها ومرفعش عينه من على اطباق الاكل.
-مراد. قالتها بصوت واطى.
-ايوه؟ قالها ومرفعش عينه من على اطباق الاكل.
-انت زعلان منى؟
-حصل خير ....حصل خير .
خبطت رجله من تحت الترابيزه برجلها .
ابعد رجله عنها من سكات
خبطته تانى.
بص لها اوى-الله؟
-متزعلش منى .
-مش زعلان يا ستى (كمل اكل تانى).
انا حسيب لك فلوس على السراحه علشان تروحى عند خالتك.
-انا معايا..... انت لسه سايب لى امبارح.
-معلش خليهم معاكى احتياطى.
(ولا كلمه زياده ولا نفس ولا ضحكه) كل كلامه صده رده.
-انا نازل رايح الصلاه .(وقام يغسل ايده).
-مراد.......مرااااد.
-عاوزه ايه ؟.............بتعيطى ليه دلوقتى؟.
-انا اسفه......انا عارفه انى زودتها اوى اوى اليومين اللى فاتوا .....معرفش ايه اللى جرى لى؟.
سكت شويه-اكتر حاجه بتنرفزنى الصوت العالى ....صح؟.
هزت راسها –صح...... بس انا تعبانه ونفسيتى متدمره.
-طيب خلاص بطلى عياط والبسى واخرجى.
-يعنى مش زعلان؟
-خلاااااااص يا ليلى.
-انت بتزعق لى ليه؟.
-يا سيتى والله ما اقصد.
(طب طب عليها وباسها فى راسها وخرج).
طق....طق.....طق.
فتحت خالتها الباب.
-ليلى.....حبيبه قلبى......وحشانى والله .......ادخلى ادخلى .
-وحشانى يا خالتى اوى والله.
(قعدوا مع بعض يحكوا على الدنيا واللى فيها كالعاده)
-مالك يا ليلى؟ سرحانه فى ايه؟ شكلك مش فرحان زى عوايدك؟فى حاجه؟........زعلانه من مراد؟ ........ده مراد حبيبى ومبتطلعش منه العيبه.
اتنهدت-انا مش زعلانه منه ....ده انا اللى مزعلاه.
-اخس عليكى .....ليه كده؟.
-يا خالتى زهقانه وطهقانه.........حاسه بملل فظيع فى البيت انتى عارفه يا خالتى انا بحب مراد قد ايه بس بحس انه مش بيحبنى والاحساس ده مخلينى زى المجنونه فى البيت وعلى طول مضايقاه.
-مش بيحبك ازاى؟....ده انتوا ايام الخطوبه كنتو شبه عمر الشريف وفاتن حمامه.
-اهو من يومين بس كرههم الاثنين وهما سبب مشاكلنا .
ضحكت خالتها وبصت لها:
-فهمينى يا بنتى .......بخلان عليكى؟
-ابدا.
-طمعان فى ورثك؟
-ابدا ...ابدا.
-يعرف عليكى واحده يابت؟؟ (قالتها بحذر)
-اخس عليكى يا خالتى ده مراد بتاع ربنا ومالوش فى كده ابدا ؟
-اومال ايه بس؟
-مش حاسس بيا.
-ايييييييه؟؟.............مش بيقوم بواجبه الشرعى؟
-ياااااااا خااااالتى يااااا حبيبتى....... مش بيكلمنى كلمه حلوه........هاملنى دايما ......مش بنرغى سوا .....ده بيجى من الشغل ينام وينزل الشغل التانى ....مش حاسه انه محتاجنى الا علشان اشيل هدومه او اعمله اكله.
ده مش بيشكرنى ابدا على اى حاجه ولازم ينتقدنى .........ده كوووووم وانه بطل يقولى يا لووله يا حبيبتى زى زمان كووووووم تانى .
-يابنتى سيبك من الخيال ده.(قالتها فى سخريه).
انتى مش اتجوزتى؟ وعيشتى لك يومين فى الخطوبه ضحك ولعب ؟؟ خلاص اعقلى بقا.
-اعقل ليه يا خالتى؟.......هو اللى انا بطلبه جنان؟........... بطلب يكون رومانسى وشاعرى؟
-يووووه.......هو فى راجل كده فى الدنيا؟؟...........شكلك بتتفرجى على افلام كتير ....يا بنتى اعقلى.
-يا خالتى .......مراد اتغير عن الاول مبقاش زى زمان.
مصمصت شفايفها –وكسسسسسسسسه........كلهم كده والنبى يابنتى.
عارفه عمك عبده الملئح جوه ولا مؤاخذه يعنى فى دى الكلمه كان شبه فريد شوقى ايام زمان ...طول بعرض ...متعرفيش ازاى كش وكعبرودخل فى بعضه كده وبقا شبه عبد الفتاح القصرى.
قالت ليلى فى استغراب-هو عمى عبده متولدش كده؟.
-لا والله ....كان حاجه تانيه خالص بس الجواز بيغير ....انا سمعت فى الراديو انها هووورموونااات.
-هورمونات ايه يا خالتى؟لالا اكيد حاجه تانيه.
قالت بقوه دفاعيه-والله ما انا اللى عملت فيه كده.
-بس انتو يا خالتى كنتو بتحبو بعض اوى ...صح؟.
سرحت خالتها اوى-ياااااه فكرتينى باللذى مضى......ده مكنش حب عادى ده كان ..........
صوت اجش من جوه الاوضه-الشاى يا صفيه.
اتغير شكلها وفردت جسمها على ورا وكشرت اوى وبصوت عالى –حااضر.
جتك نيله فى همك وفى طلباتك(قالتها بصوت واطى).
بصت لليلى ورجعت للرقه تانى والسرحان فى عم عبده وكانها بتتكلم على حد تانى غير اللى شتمت سلسفين اللى جابوه.
-كان لما ييجى عندنا كنت بحس بخبط فى.........
-بسرعه يا صفيه علشان نازل القهوه.
-خبطه فى دماغك يابعيد.(بصوت واطى).
المهم يا ليلى ......نكمل كلامنا ولما زعل منى مره حسيت بحاجه بتشكنى ف............
-يا صفيه الجلابيه البيضاء فين؟؟
-تنشك ف نواضرك يا بعيد(بصوت واطى).
زعقت بصوت عالى –عندك وراء الباب.
اعمى القلب والبصيره.
نكمل يا لوله.......
طلع عم عبده من الاوضه وهو بيهرش فى شعره وعينه مليانه عماص-انتى معندكيش دم يا وليه؟ معملتيش الشاى ليه؟حتاخر على القهوه.
لاحظ وجود ليلى –اهلا اهلا.......ازيك يا ليلى يا بنتى؟
-الحمد لله ياعمى ربنا يخليك .
بص تانى لصفيه-معملتيش الشاى ليه لحد دلوقتى؟
-فى ايه؟......حتتاخر عن الديوان ياخى ......يا شيخ بلا نيله....اهو كل يوم ينزل يقابل اللاضيش بتوع المعاشات على القهوه .
-مش بعرف اشربه غير فى البيت .
-يووووه......كل شويه طلبات طلبات.......انا قاعده مع بنت اختى حبه.
ليلى فى كسوف-قومى يا خالتى ميصحش كده.
-مش قايمه........يا ختى مش بيبطل طلبات ولو اتاخرت شويه تقوم الدنيا متقعدش......فيها ايه لو استنا حبه.؟
بصلها عم عبده وبص لليلى –عجبك كده يا ليلى؟.........طيب انا حعمله لنفسى.
ودخل المطبخ
بصيت عليه صفيه وبرطمت حبه-خييييبه والنبى ميعرف يجيب لنفسه كوبايه مايه.
(الشاى غلى على النار وراح عبده يصبه)
-اى .....اى......ايدى.
اتفجعت صفيه-عبده.....يادى النصيبه.
جرت على المطبخ بسرعه......غسلت له ايده وحطت له دوا على جلده.
فى فجعه-كده برضو يا عبده مش تخلى بالك؟.........اهو الجرح الصغير ده حيورم وانت سكرك عالى على طول ....اى جرح مش حيقفل......يعنى مش حرام عليك توجع قلبى ؟.
-يعنى هو انا جالى السكر منين مهو بسببك.........انا نازل القهوه.
نزل من الشقه وقفل الباب وراءه
-رجعت لليلى وايدها على قلبها........انا اتفجعت والله ........الحمد لله انها مش ايده الشمال اللى عامل فيها العمليه.
وجع قلبى الهى يوجع قلبه ........اهو غار يا حبيبتى علشان نرغى براحتنا.
ليلى بعد اللى شافته صممت انها لازم متكونش زى صفيه ولا مراد زى عم عبده مهما حصل ومهما طال بيهم العمر سوا.
-طيب يا خالتى انا مروحه.
-الله؟....لسه بدرى انتى مش قولتى مراد جى ؟
-لا....حكلمه يروح على البيت.
-ربنا يهدى سرك يا حبيبتى.
وقفوا على الباب
-مع السلامه يا ليلى
-مع السلامه يا خالتى .
-ليلى ....خالى بالك من جوزك ده ابن حلال وميتعوضتش.........اعقلى وبلاش جنانك ده ومينفعش تبقى فاضيه له كده ...... اشغلى نفسك بحاجه او هاتيلك حته عيل يلهيكى عن الغلبان ده.
-غلباااان؟؟............ربنا يسهل يا خالتى .......مع السلامه.
تمت
ليست هناك تعليقات:
إرسال تعليق