انتى بتتكلمى جد يا ليلى؟ حامل؟ حامل؟ انا حسيب الى فى ايدى وجايلك حالا.
((فى الشقه))
دخل مراد الشقه وفى ايده بوكيه ورد .
-ليلى ......ليلى.
-مراد ......انت جيت؟
-انتى بجد حامل؟
-اه والله حامل ....اول معرفت كلمتك على طول.
حضنها جامد وبفرح شديد- انا مش مصدق نفسى......حكون اب ......حكون اب.......ياااااه ياليلى.
فى فرح- براحه يا مراد عليا.
فى فجعه- اسف .....اسف.........اصل الفرحه مش سايعانى.
-فرحان؟
-فرحان بس؟........ده انا حطير من الفرحه.
اتنهد وقعد على الكرسى.
وقفت ادامه وقالت بكسوف وهى بتلعب فى الورد- انت نسيت حاجه مهمه.
-ايه؟
-تشيلنى وتنيمنى على السرير وتقولى من هنا ورايح متعمليش حاجه فى البيت خالص انا حعمل كل حاجه.
بص لها اوى باستغراب- يخربيت الافلام العربى اللى اكلت دماغك.........ما انا جايب لك ورد بخمسين جنيه عاوزه ايه تانى بقا؟
ضحكت اوى وقالت- خلاص يا مراد بلاها افلام عربى.
اتكلمت جد وقالت- المهم الدكتور قال محدش يزعلنى وحكون عصبيه فى الحمل ولازم تستحملنى ...........مفهوم؟
بص لها اوى وهز راسه واصطنع الابتسامه وقال فى سره- 9 شهور نكد وعصبيه ........ربنا يستر.
-بتقول حاجه يا مراد؟
-ابدا.......ابدا.
((فى يوم))
مراد داخل اوضه النوم اللى نايمه فيها ليلى.
فجاءه ليلى بتصرخ- اقلع القميص ده......مش طايقه ريحته.
اتفجع مراد- فى ايه مالك؟
-مش طا يقه ريحه البارفان ده........ارمى القميص ده بره.
-الله؟؟؟.............دى الريحه اللى بتحبيها.
-مش مستحملاها .......حرجع.
اتنهد وسند ضهره على الحيطه وقال بنرفزه- انا تعبت بجد........مش قادر استحمل .......دى مش طريقه دى ......دايما صريخ وزعيق ونرفزه........امبارح مش طايقه ريحه الاكل اللى جيت من الشغل وفضلت تلات ساعات اعمل فيه وفى الاخر تسوطى وتصرخى واضطر ادلقه كله فى الزباله ........حسى بيا وارحمينى انا تعبت .
سكتت وبصت له وقعدت تعيييط – يعنى اعمل ايه يعنى؟........حرام عليك ........انت اللى مش حاسس بيا ........هو بمزاجى؟؟.......انا حموت من الجوع ومش قادره اكل مش قادره احط حاجه فى معدتى ......مش بايدى يا مراد.
صعبت عليه وقعد جنبها- انا اسف .......متزعليش منى ......انا تعبان من الشغل وفى مشاكل كتره فوق دماغى .......حقك عليا.
حضنها جامد وفضلت ساكته
-ليلى؟.........ليلى؟........ساكته ليه؟
بص لها ولقى وشها احمر وكاتمه نفسها.
-مالك؟......كاتمه نفسك كده ليه؟
-مش ...مش طايقه ريحه القميص......
جرت على الحمام علشان ترجع.
ليست هناك تعليقات:
إرسال تعليق